"Gəncə" Azərbaycan Basketbol Liqasının pley-in mərhələsinin cavab oyununda "Lənkəran"a 100:74 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi fikirlərini bölüşüb.

Halil Atlı ("Gəncə"): "Komandamı təbrik edirəm. Bu mövsüm yaxşı kollektiv qurduğumuzu fikirləşirəm. Bura gələndə ilk hədəfim "Gəncə"ni təkrar pley-offlara daşımaq idi. Azərbaycan Kubokunda final oynadıq. İndi də çempionatda həlledici mərhələyə vəsiqə qazandıq. Bunu gəncəlilərə həsr edirik. Məncə, bu mövsüm qurduğumuz komandaya və büdcəyə görə yaxşı işlər gördük. Oyunçularımın hamısına bir-bir təşəkkür edirəm. Addım-addım irəliləyib əlimizdən gələnin ən yaxşısını etməyə çalışacağıq. Növbəti rəqibimiz ilə oyunlara köklənirik. Azarkeşlərimizə də səslənirəm. Onların dəstəyi bizi həm xoşbəxt edir, həm də güc verir. İşin ən önəmli hissəsinə gəldik. Fanatların dəstəyinə hər zaman olduğundan daha çox indi ehtiyac olacaq. Onları oyunlarımızda görmək istəyirik. Hər şeyə görə azarkeşlərə təşəkkür edirəm".

Georgi Kondruseviç ("Lənkəran"): "Demək olar ki, 3 period mübarizə apara bildik. Daha sonra isə 9 nəfərlə oynamağımız, rotasiya imkanlarının az olması öz sözünü dedi. Əsas oyunçularımızdan olan Ceydem Folkner xəstələndiyi üçün bu matçı buraxmalı oldu. 4-cü periodda bu özünü daha çox göstərdi. Oyun bizim üçün psixoloji olaraq da çətin idi. Təbii ki, azarkeşlərimiz önündə daha yaxşı oyun nümayiş etdirmək istəyərdik. Döyüşdüyümüzü düşünürəm. Ən azından bunu etməyə çalışdıq. Təssüf ki, bacarmadıq. Amma bu cür güclü liqada heyətdə hər zaman problemlərin yaşanması fonunda qələbələr qazanmaq çətindir. Buna baxmayaraq, 3 dəfə rəqibləri məğlub etdik. Ötən il "Şəki" komandasının cəmi 1 qələbə qazanmasını göz önünə gətirsək, yeni yaranan komanda üçün bu, pis nəticə deyil. Nəzərə almaq lazımdır ki, cəmi 5 oyunda biz tam heyətlə mübarizə apardıq. Bəzi oyunlarda qələbəyə çox yaxın olduq. Əfsuslar olsun ki, həmin matçlarda şans bizim tərəfimizdə deyildi. Azarkeşlərimizə minnətdarlığımı bildirirəm. Onlar bizə dəstək oldular. Bu mənim üçün əla motivasiya idi. Qalib gəlməsək də, onlar hər dəfə bizə dəstək oldular. Mən  də  bir  məşqçi kimi əlimdən gələni etdim. Mövsüm ərzində ən yaddaqalan matç  "Sunqayıt"a qarşı ilk oyun oldu. 14 xal geridə olsaq da, yekunda 15 xal fərqlə qələbə qazandıq.

Azərbaycnn çox maraqlı ölkədir. Mən burada yeni insanlarla tanış oldum. Burada olmaq mənim üçün xoş oldu. Ümumilkdə baxsaq, deyə bilərəm ki, gözəl ölkədə əla günlər keçirdim. Lənkəran da fərqli yerdir. Bakıya ümumiyyətlə bənzəmir".