"Ötən mövsümlə müqayisədə bu il çox yaxşı çıxış edirik".

Prosport.Az xəbər verir ki, bunu "Sumqayıt"ın basketbolçusu İsmayıl Əliyev deyib.

O, “Sərhədçi” ilə pley-in mərhələsindəki oyunlar ərəfəsində komandasının şanslarından danışıb. Əliyev əvvəlcə “Sumqayıt”ın çıxışını dəyərləndirib: "Fikrimcə, növbəti mövsüm daha xoş təsir bağışlayacağıq. Hamımız üzərimizə düşən vəzifəni yerinə yetiririk. Məncə, pley-ində də belə uğurlu çıxış edəcəyik”.

Vaxtilə “Sərhədçi”də oynayan İsmayıl sabiq komandasını təhlil edib: “Bir vaxtlar “Sərhədçi”nin üzvü olmuşam. Çox yaxşı komandadır. Rəqibi qətiyyən zəif adlandırmaq olmaz. Pley-ində bizi çətin oyunlar gözləyir. “Sərhədçi”ni mübarizədən kənarlaşdırmaq üçün vahid komanda olmalıyıq. Ən əsası müdafiədə etibarlı oynamalıyıq. Mümkün qədər onların məhsuldarlığını aşağı salmalıyıq. Məqsəd pley-offa vəsiqə qazanmaqdır”.

İsmayıl Əliyev klubun azarkeşlərinə də çağırış edib: “Cümə günü azarkeşlərimizi Sumqayıt Olimpiya İdman Kompleksində gözləyirik. Onlar mövsüm boyunca bizə dəstək verib. İstərdim ki, pley-in mərhələsində də yanımızda olsunlar. Azarkeşlərimizin dəstəyi ilə “Sərhədçi”ni məğlub etmək istəyirik”.

Qeyd edək ki, “Sumqayıt” – “Sərhədçi” matçı aprelin 11-də keçiriləcək.