Serbiyanın Zlatibor şəhərində keçirilən U-15 Gimnaziadanın 3x3 basketbolu üzrə qız və oğlan komandalarımız mübarizəyə uğurlu start verib.

Prosport.Az-ın Serbiyaya ezam olunmuş əməkdaşının verdiyi xəbərə görə, əvvəlcə B qrupunda qız komandamız çıxışa başlayıb.

Tatyana Deniskinanın baş məşqçisi olduğu millimiz B qrupunda meydan sahibinin 2-ci komandasına xal vermədən qalib gəlib – 18:0. Komandamız 2-ci görüşdə Rumıniyaya 10:20 hesabı ilə uduzub. Qız yığmamız sabah Hindistanın 1-ci komandası (Bakı vaxtı ilə saat 13:00) və Estoniya (14:00) ilə qarşılaşacaq. U-15 millimiz aprelin 10-da isə Çilinin 2-ci komandası (16:40) və Ukrayna (17:40) ilə görüşəcək.

Zaur Paşayevin baş məşqçisi olduğu oğlan millimiz isə günün son qarşılaşmasında Meksika ilə qarşılaşıb. Güclü azarkeş dəstəyi altında oynayan komandamız çətin qarşılaşmadan qalib ayrılıb – 11:8.

B qrupunda yer alan oğlan yığmamız sabah Çilinin 1-ci komandası (14:20), Benin (16:45) və Serbiyanın 2-ci komandası (18:25) ilə oynayacaq. Ayın 10-da isə U-15 millimiz Kosta-Rika (16:20) və Nepalla (17:20) qarşılaşacaq.

Qeyd edək ki, aprelin 9-da 3x3 basketbolda istirahət günüdür.