"Sabah" Azərbaycan Basketbol Liqasının XIX turunda NTD üzərində 105:79 hesablı qələbə qazanıb.

Prosport.Az xəbər verir ki, hər iki komandanın baş məşqçisi matçla bağlı fikirlərini bölüşüb.

Rimas Kurtinaytis ("Sabah"): “Qələbəyə və müntəzəm mövsümü lider olaraq başa vurduğumuza görə şadam. Amma məşqçi olaraq məni nəticədən əlavə, həm də komandanın oyun keyfiyyəti maraqlandırır. Görüşün sonunda hesab arasındakı fərqdə 30, 20 və ya 2 xal öndə olsaq da, maksimum oynamalıyıq. Yaxşı temp yaxalamışıq. Amma yenə bir müddət fasilə olacaq. Fikir vermisinizsə, biz 3 məğlubiyyətimizi məhz fasilədən sonra çıxdığımız oyunlarda almışıq. Fürsətdən istifadə edərək Azərbaycan xalqını qarşıdan gələn Novruz bayramı münasibətilə təbrik edirəm”.

Tahir Baxşıyev (NTD): "Sabah" hazırda yaxşı formadadır. Onlar liqada inamlı oyun göstərir. Rəqib Kubokda uduzsa da, bu, başqa turnirdir. Başa düşürdük ki, bizi çətin oyun gözləyir. Əkbər Məmmədov və Tayri Boykin zədəli olduqları üçün oyunu buraxırdı. Digər tərəfdən, gənc oyunçulara şans verdik. Hər matçdan faydalanmaq lazımdır. Murad Babayev yaxşı oynadı. Amma o daha da yaxşı çıxış edə bilərdi. Bizi Kubokun yarımfinalı gözləyir və bütün fikirlərimiz bu matça yönəlib. Uşaqlara bir neçə gün istirahət verəcəyik, zədəliləri müalicə edəcəyik. Sonra isə “Neftçi”yə qarşı oyuna hazırlaşmağa başlayacağıq. Bizim üçün indi bu prioritetdir”.

Qeyd edək ki, “Sabah” sona bir tur qalmış pley-offa vəsiqəni təmin edib. NTD isə A qrupunda 5-ci pillədə qərarlaşıb.