“Öncə qələbə münasibətilə komandamı təbrik edirəm".

Prosport.Az xəbər verir ki, bu sözləri “Neftçi”nin məşqçisi Daviti Çivçivadze Azərbaycan Basketbol Liqasının XIX turunda “Sərhədçi” ilə oyundan sonra deyib.

Gürcüstanlı mütəxəssis 84:68 hesabı ilə qalib gəldikləri oyunu şərh edib: "Bildiyimiz kimi, pley-offa az qalıb. Hər bir oyun vacibdir. Bu görüşdə müdafiə ribaundlarında problemlər yaşadıq. Rəqib komanda 23 hücum ribaundu etmişdi və təbii ki, bu çoxdur. Bunun üzərində işləməliyik. Ribaunda nəzarət edən komanda qalib olur. Artıq biz Azərbaycan Kubokunun yarımfinalına hazırlaşacağıq”.

Ardıcıl 5 matçda məğlub olan "Sərhədçi"nin baş məşqçisi Evrən Alkaya isə oyunla bağlı bunları söyləyib: “Bizim üçün çətin matç oldu. Müdafiə planında səhvlər etdik. Çox rahat xallar itirdik. Bununla yanaşı, atmalı olduğumuz “3-lük”lərdən 9%-ni xala çevirə bildik. Belə olduqda geridə qaldıq. Bu da komandanın motivasiyasını və müdafiə gücünü aşağı saldı. Müdafiədə çox bəsit səhvlər edirik. Bəlkə də oyunçularımın üst-üstə gələn məğlubiyyətlərdən sonra müdafiə müqaviməti zəiflədi. Amma təcili olaraq bunu düzəltməliyik. Çünki 2 matç sonra pley-in oyununa çıxacağıq. Bu matçlarda komandanı ən üst səviyyəyə çıxarmağa çalışacağam. Ancaq 2 gün dincəlib, ondan sonra məşqlərə təkrar başlayacağıq. Yeni oyunçularımızın adaptasiyası üçün 1 hazırlıq məşqi daha keçirəcəyik. Bu matçda çox hazır bir “Neftçi”yə qarşı aşağı səviyyədə “3-lük”lər və müdafiə səbəbindən məğlub olduq. Komandamızı düzəltməyə çalışacağam”.

Qeyd edək ki, "Neftçi" bu qələbə ilə pley-offa vəsiqəni təmin edib.