"Bugünkü matça görə oyunçularımın hər biri ilə fəxr edirəm. İlk hissədə 11 xal fərqlə geri düşməyimizə və motivasiyamızın korlanmasına baxmayaraq, basketbolçularıma özləri və geydikləri forma üçün oynamalarını tapşırdım".

Prosport.Az xəbər verir ki, bunu "Şəki" basketbol komandasının baş məşqçisi Bedri Meriç "Gəncə" ilə oyundan sonra klubun mətbuat xidmətinə açıqlamasında deyib.

O, Azərbaycan Basketbol Liqasının XIX turunda “Gəncə”yə qalib gələrək vahid lider olduqları matçı dəyərləndirib: “2-ci hissədə müdafiə planımız işə yaradı. Rəqibə 19 dəfə top itkisi yaşatdıq. Matçın qırılma nöqtəsi burada oldu. Əslində, daha rahat qalib gələ bilərdik. 16 sərbəst atışdan yararlanmağı bacarmadıq. Bu problemi düzəltməyimiz lazımdır. 3 xallıq atışlarda da zəif oynadıq. İstənilən halda, qalib gəldik. İstər oyuna baxmağa gələn azarkeşlərimizə, istərsə də bizi "YouTube" üzərindən dəstəkləyənlərə öz təşəkkürümü bildirirəm. Əlavə olaraq klubun heyətinə – media nümayəndəsindən həkiminə kimi təşəkkür edirəm. Amma işimiz hələ bitməyib. Qarşımızda daha 40 dəqiqə var”.

O bildirib ki, mövsümün əvvəlində əsas hədəf 1/4 finala çıxmaq olub: “Lənkərandakı matçda da qalib gəlib, önümüzə qoyduğumuz məqsədə nail olacağıq. Bu uşaqlar möhtəşəm hekayə yazır. Hardasa "pəri nağılı" yaşayırıq. Bu hekayə bizi hara kimi aparacaq, hamımız birlikdə görəcəyik".

Qeyd edək ki, “Şəki” “Gəncə”ni overtaymda 91:87 hesabı ilə məğlub edib.