Azərbaycan Basketbol Liqasının XIX turunda "Sumqayıt" "Quba"ya 112:103 hesabı ilə qalib gəlib.

Prosport.Az oyundan sonra hər iki komandanın baş məşqçisinin fikirlərini təqdim edir:

Vadim Kuramşın ("Sumqayıt"): "Uşaqları qələbə münasibətilə təbrik edirəm. Hərçənd hər şey biz istəyən kimi getmədi. Doğrudur, oyuna yaxşı başladıq. Xal fərqini 15-ə qədər qaldırmışdıq. Sadəcə, sonra yenə də kombinasiyalı oyuna üstünlük vermədik. Bu da "Quba"nın bizə çatması ilə nəticələndi. Matçın sonlarında yenə də fərqi artırdıq. Bu gün məhsuldar oynayan Endryu Louder, Zayon Yanq, Kolin Qolsona, xüsusilə də tripl-dabl edən Eli Lourensə xüsusi təşəkkür edirəm. Biz artıq B qrupunda 4-cü pilləni təmin etdik. İndi görək pley-in mərhələsində hansı komanda ilə qarşılaşacağıq. Belə baxanda rəqibin adı bizim üçün önəmli deyil. İstənilən komandaya qarşı döyüşəcəyik!"

Şəhriyar Əsgərov ("Quba"): "Yaxşı hazırlaşmışdıq. "Sumqayıt"da 3 oyunçu ön plana çıxdı. Bu gün "Sumqayıt"ın oyunçularının atdıqları da səbətə düşdü. Müdafiədə etdiyimiz dəyişikliklərə baxmayaraq, yenə uduzduq. Mövsümdə 1 oyunumuz qalıb. "Ordu" ilə matça yaxşı hazırlaşıb müntəzəm mövsümü yüksək notlarla bitirməyi düşünürük. Görək də necə alınacaq. Uğurlu olmaq istəyirik".