Azərbaycan Basketbol Liqasının "Neftçi" – NTD görüşü nominal meydan sahiblərinin 76:64 hesablı qələbəsi ilə yekunlaşıb.

Prosport.Az hər iki komandanın məşqçisinin fikirlərini təqdim edir:

Tahir Baxşıyev (NTD-nin baş məşqçisi): “Matça yaxşı başladıq. Amma oyunun sonu istədiyimiz kimi alınmadı. 3-cü periodda Detrek Brauninq 5 fauldan sonra oyunu tərk etdi. Bu itki özünü göstərdi. Hücumda intizamlı oynaya bilmədik. Bu da məğlubiyyətə gətirib çıxardı. Əvvəlki oyunlarımıza baxsaq, daha çox xal buraxmışdıq. Bu gün rəqibə cəmi 76 xal verdik, amma məğlub olduq. Bu oyunu analiz etməliyik. "Sabah"la oyuna hazırlaşacağıq. Mən heç vaxt hakimlik barədə danışmıram. Və düşünmürəm ki, hakimlərin qərarları məğlubiyyətimizə səbəb oldu. Qərəz görmədim. Hakimlər bacardıqları kimi idarə edir. Hər kəs səhv edə bilər. Digər tərəfdən, basketbol təmas oyunudur. Bu, voleybol deyil. Mən həmişə basketbolçulara oynamağa imkan verilməsinin tərəfdarı olmuşam. Görürəm ki, amerikalılar oyun zamanı bir-biri ilə danışır. Onlar tez-tez verilən faullara təəccüblənir. Müasir basketbolda oynamağa imkan verirlər. Buna baxmayaraq, hesab edirəm ki, hakimlərimiz də inkişaf edir. Hər şeyi birdən əldə etmək olmaz”.

Daviti Çivçivadze ("Neftçi"nin məşqçisi): “İlk olaraq komandamı yaxşı oyuna və layiqli qələbəyə görə təbrik edirəm. NTD komandası çətin rəqibdir. Ona görə oyun da çox çətin keçdi. İlk hissədə əks-hücumla bağlı bəzi problemlərimiz var idi. Lakin 2-ci hissədə bu problemləri aradan qaldırdıq və yaxşı atışlar etməklə bərabər, həm də aqressiv müdafiə olunduq. Tədricən oyunumuz öz axarına düşdü və sonda qələbə qazanan tərəf olduq. İndi növbəti rəqibimiz olan “Sərhədçi”yə qarşı hazırlaşmalıyıq və bunun üçün cəmi 2 gün vaxtımız var. Buna baxmayaraq, əlimizdən gələni edəcəyik ki, həmin oyunda da qələbə qazanaq".