Bu gün keçirlmiş AFFA Region Liqasının püşkündə ən maraqlı məsələ bu kişinin orada iştirakıdır. Bir-birinə zidd olan 2 turnir – Region Liqası və Həvəskarlar Liqası. Biri AFFA-nın sabiq vitse-prezidenti və baş katibi Elxan Məmmədovun təşəbbüsü ilə yaradılıb, digəri əvvəldən vardı. Biri yaradılarkən, digəri qaranlıq məqamlara görə ləğv edilmədi (diqqətlə düşündükdə, səbəbini tapmaq olur).

Şəkildə gördüyünüz kişi Rüfət Əmirovdur – Həvəskar Futbol Federasiyasının prezidentidir, həm də hərbçi zabitdir. İllərdir ki, az qala Elxan Məmmədova qarğış edir ki, niyə bizim turnir ola-ola Region Liqasını çıxartdı. Və AFFA-ya yeni rəhbərlik gələndən sonra hər dəfə ümid edir ki, İcraiyyə Komitəsi Region Liqasını ləğv edərək UEFA-da iştirak məsələsini onların turnirinə həvalə edəcək, həmçinin ora ayrılan maliyyə həvəskarların çempionatına yönəldiləcək.

Bu gün bu kişinin bura çağırılması o deməkdir ki, əl çəkin, əvvəlki rəhbərlikdən qalma taktikanı davam etdirəcəyik: Region Liqasına da pul ayıracağıq, hələ Həvəskarlar Liqasını da azca pulla şirnikləndirəcəyik. Rüfət Əmirov, bu gedişlə çox gözləyərsən. Hər il eyni məzhəbə qulluq edən bu 2 çempionatı keçirməkdən qazananlar, qoy qazansın. Siz də hər il "görək bizə nə qədər pul ayrılacaq" kimi saf xəyallarda qalarsız.

Yeri gəlmişkən, aylardır başlamaq bilməyən Region Liqası 40 komanda ilə nəzərdə tutulub, 54 komanda ilə keçiriləcək. "Xankəndi", "Xocalı" söhbətləri isə ortaya atılmış mif imiş. Büdcə yox idi. Klublara belə deyilmişdi. Hər komandaya geyimdən əlavə, ev oyunları üçün tibbi yardım, səfər xərcləri ödənilməli idi. Görünür, həmin maliyyə məhz "həvəskarlar"ın ağzından kəsilib, II Liqaya göz dikən yarımpeşəkarlara ayrılmalı oldu.

Səbuhi Musa