"Basketbolçularıma qəhrəman kimi döyüşdüklərinə görə minnətdaram".

Prosport.Az xəbər verir ki, bunu "Sumqayıt"ın baş məşqçisi Vadim Kuramşın Azərbaycan Basketbol Liqasında "Lənkəran"a 88:83 hesabı ilə qalib gəldikləri XVI turun oyunu ilə bağlı klubun mətbuat xidmətinə açıqlamasında deyib.

O, oyunçularını qələbə münasibəti ilə təbrik edib:

"Bizim üçün vacib qalibiyyət idi. Həqiqətən də matç çox gərgin keçdi. Nəzərə alaq ki, heyətdə ciddi itki var idi. Səhhətində problem yaşadığına görə Eli Lourensi Lənkərana gətirə bilmədik. Məcburiyyətdən 3 əcnəbi və 2 yerli basketbolçu ilə oynamalı olduq. Uşaqlar belə çətin vəziyyətdə bir-birilərinə dəstək oldu. Xüsusən də ilk hissədə Zaur Quşanov 4 dəfə dəqiq "3-lük" atmaqla komandanı arxasınca daşıdı".

Mütəxəssisin sözlərinə görə, fasilədən sonra Zayon Yanq oyunu öz üzərinə götürüb:

"O bu gün 29 xal topladı və lazım olan anda hesab arasındakı fərqi artırdı. Sevindirici haldır ki, "Lənkəran"ı ardıcıl 3-cü oyunda da məğlub etdik. Qələbə seriyasını davam etdirmək ücün "Ordu"ya da qalib gəlib, 4-cü pillədəki mövqeyimizi möhkəmləndirmək istəyirik".