Azərbaycan Basketbol Liqasının XVI turunda “Neftçi” öz meydanında “Naxçıvan”a 114:70 hesabı ilə qalib gəlib.

Prosport.Az xəbər verir ki, matçdan sonra hər iki komandanın baş məşqçisi nəticəni şərh edib:

Murat Dikmən ("Naxçıvan"ın baş məşqçisi): "Mövsümün ən pis basketbolunu oynadıq. Müdafiədə heç bir sərtlik göstərə bilmədik. Həqiqətən çox yumşaq oyun sərgilədik. Böyük fasiləyə kimi 4 foul etmişdik. Bu da komandanın nə qədər zəif müdafiə olunduğunu göstərir. Komandamız çox pis müdafiə olundu və böyük fərqlə uduzdu. 2 gün fasilədən sonra növbəti matç performansımıza təsir göstərən səbəblərdən biri idi. Komandada yorğunluq hiss olunurdu. Bu da onu göstərir ki, matça yaxşı hazırlaşmamışıq. Nəzər Quliyevin yoxluğu da bizə çox pis təsir etdi. Ona görə sistemi və oyunçuların mövqeyini dəyişdirməyə məcbur olduq. Onun yerinə çıxış edən basketbolçu ümidləri doğrultmadı. Bu, çox ağır məğlubiyyətdir. Rəqibimiz bu qarşılaşmaya yaxşı hazırlaşmışdı, bizi yaxşı analiz etmişdilər. Haqq etikləri qələbəni qazandılar. Ötən turda “Sabah” kimi güclü bir komanda ilə oynayıb, 2 gün sonra başqa bir görüşə çıxdıq. Fikirimcə, ən əsası mental olaraq oyuna daxil ola bilmədik".

Daviti Çivçivadze ("Neftçi"nin məşqçisi): "Bu oyun bizim üçün çox vacib idi. A qrupunda ilk 3 yer üçün mübarizə aparırdıq. Bu qarşılaşma bizə müdafiədə aqressivliyin və hücumda komanda oyununun vacibliyini bir daha göstərdi. Öz komandamla fəxr edirəm və layiqli qələbə münasibətilə bütün oyunçularımı təbrik edirəm. Biz bu tempdə davam etməliyik. Eyni zamanda, səhvlərimizin üzərində çalışmalıyıq. Rəqib çox güclü komandadır. Ancaq biz əla müdafiə olunduq və öz xarakterimizi ortaya qoyduq. Nəticədə rəqibimiz üzərində böyük hesablı qələbə qazandıq".