FIDE şahmatçıların mart üçün dünya reytinqini dərc edib.

Prospekt.Az xəbər verir ki, siyahıda Azərbaycan şahmatçılarından ən yaxşı göstəriciyə Şəhriyar Məmmədyarov malikdir.

9 pilləlik sıçrayışa imza atan qrossmeysterimiz 2748 xalla 11-ci pillədə qərarlaşıb. 3 addım geriləyən Teymur Rəcəbov (2692) 35-ci sırada yer alıb. 4 pillə irəliləyən Rauf Məmmədov (2657) 67-cidir.

Cədvələ 2833 xalla norveçli Maqnus Karlsen başçılıq edir.

Qadınların cədvəlində ən yaxşı təmsilçimiz dəyişib. 2 pillə geriləyən Gövhər Beydullayeva (2400) 43-cü yerə ensə də, ölkənin 1-cisi olub.

Buna səbəb Günay Məmmədzadənin 15 pilləlik geriləməsidir. O, 2396 xalla 51-cidir. Ülviyyə Fətəliyeva (2387) 7 addım yüksələrək 57-ci pillədə qərarlaşıb. Xanım Balacayeva (2358) 4 pillə irəliləyərək 85-ci olub.

Qadınların reytinq cədvəlinə çinli Yufan Hu başçılıq edir – 2633 xal.