6-cı dəfə keçiriləcək FIBA 3x3 basketbolu üzrə Qadın Seriyası turnirinin 2025-ci il mövsümü üçün təqvimi açıqlanıb.

Prosport.Az-ın xəbərinə görə, turnir bu dəfə daha az – 13 şəhərdə baş tutacaq (2023-cü ildə 23, 2024-cü ildə 20 şəhərdə keçirilib).

Yenə Azərbaycanın 3 şəhəri mərhələ yarışlarına ev sahibliyi edəcək. Bu baxımdan yeganə ölkəyik ki, yarış 3 Azərbaycan şəhərində baş tutacaq. Sumqayıt ilk dəfə bu yarışın meydan sahibi qismində olacaq. Bakı 2023 və 2024-cü illərdə, Quba isə 2024-cü ildə olduğu kimi dəyişməz ev sahibidir.

Yarışa mayda Çində start veriləcək. Turnirin mükafat fondu 1 milyon dollardan çox olacaq ki, bu da 2024-cü ilinkindən çoxdur. Avstriya, İndoneziya və Niderland ilk dəfə bu turnirə ev sahibliyi edəcək. Yarışın final mərhələsi sentyabrda olacaq. Təşkilatçı ölkə daha sonra müəyyənləşəcək.

2-3 may. Çendu (Çin)
16-17 may. Amsterdam (Niderland)
23-24 may. Marsel (Fransa)
26-27 may. Bakı (Azərbaycan)
12-14 iyun. Vyana (Avstriya)
18-19 iyun. Ulan-Bator (Monqolustan)
24-25 iyul. Cakarta (İndoneziya)
26-27 iyul. Sumqayıt (Azərbaycan)
1-2 avqust. Edmonton (Kanada)
9-10 avqust. Lansarote (İspaniya)
23-24 avqust. Quba (Azərbaycan) – FIBA posterdə səhvə yol verib, Qəbələ deyil
29-30 avqust. Debretsen (Macarıstan)

Onu da bildirək ki, bu il 3x3 basketbolu üzrə dünya çempionatının seçmə mərhələsinin oyunları 24-25 mayda Bakıda keçiriləcək. Göründüyü kimi, həmin vacib əhəmiyyətli yarışdan sonra Bakı həm də Qadın Seriyası turnirinin 4-cü mərhələsinə ev sahibliyi edəcək.

Xatırladaq ki, 2023-cü ildə Qadın Seriyasının mərhələ yarışları Astara, Şuşa və Bakıda baş tutub. Ötən il isə Qəbələ, Quba və Bakı ev sahibliyi edib.