“Sumqayıt”ı çox sevdim. Özümü burada ailənin bir üzvü kimi hiss edirəm. Biz bir yerdə ailəyik. Baş məşqçimiz Vadim Kuramşın döyüşkən kollektiv formalaşdırıb. Hər şeydən razıyam və burada olduğuma görə şadam”.

Prosport.Az xəbər verir ki, bunu “Sumqayıt”ın basketbolçusu Eli Lourens deyib.

ABŞ-li forvard əvvəlcə komandaya uyğunlaşmasından danışıb. Lourens məhsuldarlıq yarışında komanda yoldaşı Zayon Yanqla rəqabətindən də söz açıb: “Bizim aramızda heç bir rəqabət yoxdur. Buraya basketbol oynamağa və xal qazanmağa gəlmişik. Həm Yanq, həm də mən meydana çıxıb, sadəcə öz işimizi görürük. Məqsəd qələbə qazanmaq və “Sumqayıt”ı turnir cədvəlində üst sıralara daşımaqdır. Yanqın bir oyunda məndən çox xal toplamasına qıcıqlanmıram”.

Basketbolçu Sumqayıtla Bakı şəhərləri arasında müqayisə də aparıb: “Sumqayıtı çox bəyənirəm. Hərçənd Bakı ilə bu şəhər arasında müəyyən fərqlər var. Bakı mənim üçün kiçik Nyu-Yorkdur. Bu şəhərdə çox insan yaşayır, daim də tıxacda qalırsan. Sumqayıt daha sakit və rahat şəhərdir. Burada həyatdan həzz alıram”.

Eli Lourens sonda komandanın hədəflərini açıqlayıb: "Məqsəd pley-offa yüksəlməkdir. Hər halda, turnir cədvəlində heç də pis mövqedə qərarlaşmamışıq. Qarşıda bizi “Gəncə” ilə oyun gözləyir. Mütləq qalib gəlməliyik".