"Öncə rəqibimizi qələbə münasibətilə təbrik edirəm".

Prosport.Az xəbər verir ki, bunu "Şəki"nin baş məşqçisi Bedri Meriç səfərdə "Gəncə"yə uduzduqları (77:91) Azərbaycan Basketbol Liqasının XIV turunun oyunundan sonra deyib.

Türkiyəli mütəxəssis məğlubiyyətin səbəbini izah edib: "Texniki tərəfdən danışsam, rəqibə çox hücum ribaundu verdik. Meydandan kənar məsələlərdən danışsam, bu həftə biz uğursuz günlər keçirdik. Şəki Olimpiya İdman Kompleksində nazirliyin tədbirlərinə görə istədiyimiz məşqi keçə bilmədik. Gəncəyə yalnız 1 kontakt məşqi keçərək gələ bildik. Üstəlik, uzun oyunçumuz (Karl Consu nəzərdə tutur) zəhərlənərək xəstələnmişdi deyə, daha bir şanssızlıqla üzləşdik. Amma meydanda qalib gələ bilərdik. İlk hissəyə pis başladıq. 3-cü periodda toparlandıq. Ancaq dediyim kimi, rəqib hücum ribaundlarından 25 xal qazandı. Bu, çox böyük rəqəmdir. Daha əvvəl də söylədiyim kimi, qrupda 1-2-3-cü yerlər dəyişiləcək. Bundan sonra mümkün qədər çox matçda qalib gəlməyə çalışacağıq. Müntəzəm çempionatda 6 matçımız qaldı. Hamısında qalib gəlmək üçün əlimizdən gələni edəcəyik. 1-ci ola bilməsək də, 2-3-cü kimi pley-offa çıxmaq üçün hər şey edəcəyik".

Bedri Meriçin fasilənin onlara yaxşı gələcəyinə ümid etdiyini bildirib: "İndi milli komandanın oyunu ilə əlaqədar fasilə olacaq. Ötən dəfə qış fasiləsi bizə çox yaxşı təsir etmişdi. Ümid edirəm ki, bu dəfə də fasilədən sonra toparlanıb, qələbələr əldə edəcəyik".