"Artıq mən də məğlubiyyətdən yorulmuşdum".

Prosport.Az xəbər verir ki, bunu "Quba"nın baş məşqçisi Şəhriyar Əsgərov Azərbaycan Basketbol Liqasının XIV turunda "Sumqayıt" ilə matçdan sonra deyib.

Mütəxəssis qələbəyə görə sevincli olduqlarını bildirib: "Dünənki məşqdə demək olar ki, yarım saat söhbət etmişik. Komandada hər şey var. Sadəcə, demək olar ki, qələbə ruhu itmişdi. Hər halda, "Sumqayıt" üzərindəki qələbə komandamıza stimul verəcək. "Sumqayıt" çox yaxşı komandadır. Deyərdim ki, rəqiblərin gücləri eynidir. Bizi çəkindirən ötən dəfə onların bizim üzərimizdə ağır qalibiyyət ("Sumqayıt" yanvarın 15-də "Quba"ya 126:90 qalib gəlməklə çempionatda 1 oyuna maksimum xal atışı edən komanda olmuşdu – red.) qazanması idi. Bu gün bir qədər onun əvəzini çıxa bildik.

Baş məşqçi olaraq rəqiblərin gücünə bələdik. Əvvəl də demişəm ki, bu qrupda hər bir komanda digərinə qalib gələ bilər. "Gəncə"nin məşqçi və oyunçuları buna görə məndən inciyib. Amma qrupumuz elədir ki, komandaların biri digərinə qalib gələ bilər. Sadəcə, "Lənkəran" heyətlə bağlı problem yaşayırdı. Yoluna qoyublar və oynayırlar. Eləcə də, "Sumqayıt"ın heyəti yerindədir, məşqçi işi də görünür. Yaxşı mübarizə oldu. Qalib gəlməyimiz sevindirici haldır. Nəhayət ki, qalib gəldik və Allah qoysa, davamı da gələr".

Qeyd edək ki, "Quba" – "Sumqayıt" qarşılaşması nominal meydan sahiblərinin 90:80 hesablı qələbəsi ilə yekunlaşıb.