"Baş məşqçi əsl mövqeyimin hücumçu olduğunu bilir. Bu barədə onunla danışmışıq. Sağ cinahda oynadırsa, deməli, orada da oynaya bilərəm".

Prosport.az xəbər verir ki, bunu "Konyaspor"da çıxış edən Azərbaycan millisinin futbolçusu Mahir Emreli "Ümraniyəspor"la 2:2 hesablı heç-heçə etdikləri Türkiyə Super Liqasının XXVII tur oyunundan sonra "Kon TV"yə açıqlamasında deyib.

25 yaşlı hücumçu komandasına assist və qollarla fayda verməyi səbirsizliklə gözlədiyini bildirib: "Ümid edirəm ki, növbəti qarşılaşmada bu səddi aşa biləcəyəm".

Mahir Emreli "Ümraniyespor"la matçdakı nəticənin ədalətli olduğunu söyləyib: "Oyunun sonları daha yaxşı və bol qollu alındı. Səfərdən 3 xalla qayıtmaq istəyirdik, amma qismət olmadı. Düşünürəm ki, ən azından son dəqiqə qolu ilə heç-heçə əldə etdiyimiz üçün sevinməliyik. Çünki milli komandaların oyunları ilə əlaqədar fasilədən sonra toparlanmaq komanda üçün çətin oldu. Bəzən belə çətinliklər ola bilər. Düşünürəm ki, növbəti görüşdə daha yaxşı oynayacağıq və 3 xal qazanacağıq".