Azərbaycan Basketbol Liqasının XIII turu çərçivəsində keçirilən "Ordu" – "Gəncə" (93:90) oyunundan sonra hər iki komandanın baş məşqçisi fikirlərini bildirib.

Prosport.Az həmin fikirləri təqdim edir:

Alberto Blanko (“Ordu”): “Çox çətin oyun oldu. Bununla belə, qələbə qazanmağı bacardıq. Hazırkı vəziyyətdə bu qələbəni çox vacib hesab edirəm. Çünki kifayət qədər problemlərimiz var. Əsas heyətin 2 aparıcı üzvü zədəyə görə matçı buraxırdı. Uşaqlar əla çıxış etdi. Fantastik bir qələbədir. Oyunçularımı təbrik edirəm. İlk yer uğrunda mübarizə aparırıqsa, mütləq belə oyunlarda qalib gəlməliyik. Oyuna pis başlamışdıq. Hesabda böyük fərq yaranmışdı. Ancaq 3-cü perioddan başlayaraq meydanda daha yaxşı mübarizə apardıq. Görüş o qədər gərgin keçdi ki, overtayma ehtiyac yarandı. Bu hissədə isə biz qalib gəldik. Ancaq “Gəncə” komandası çox əzmkar mübarizə apardı. 3 xallıq atışlarda hələ ki istənilən nəticəni verə bilmirik. Belə olanda xal qazanmaq üçün başqa vasitələrdən, daha mürəkkəb hücumlardan istifadə edirik. Ancaq 3 xallıq atışlar üzərində işləyirik. Çünki bir çox oyunlarda belə atışlardan istifadə edə bilməmişik. İnanıram ki, gələcək oyunlarda belə problemlər olmayacaq. Özüm də 1 həftədir ki, xəstəyəm. Ancaq bu qələbə mənə əlavə ruh yüksəkliyi verdi”.

Halil Atlı ("Gəncə"): “İlk növbədə bizi səfər oyununda tək buraxmayan, dəstək verən azarkeşlərimizə təşəkkür edirəm. Onlara Bakıda qələbəni ərmağan etmək istədik. Amma olmadı. Düşünürəm ki, basketbolsevərlər üçün yaxşı oyun oldu. Heyətdə itkimiz vardı. Rotasiya etmək imkanımız geniş deyildi. Oyun planımızı da buna uyğun qurmuşduq. Meydanda yaxşı işlər gördük. Sona kimi də mücadilə etdik. Amma bəsit 1-2 səhvdən sonra əsas vaxtda üstünlüyü verdik. Matçda əlavə hissə oynanıldı. Orada da adi səhvlərdən görüşü az fərqlə uduzduq. Qarşıdakı oyunlara diqqət edəcəyik. Çatışmazlıqları aradan qaldırmağa çalışacağıq. Azarkeşlərimizə yaxşı oyunlar göstərmək, onları sevindirmək istəyirik".