"Sumqayıt" qalib gəlmədi, biz məğlub olduq".

Prosport.Az xəbər verir ki, bunu "Şəki"ın baş məşqçisi Bedri Meriç "Sumqayıt"a qarşı Azərbaycan Basketbol Liqasının XIII turunun oyunundan sonra deyib.

Türkiyəli mütəxəssis açıqlamasında məğlubiyyətə görə üzgün olduqlarını bildirib: "Rəqib komandanı qələbə münasibətilə təbrik edirəm. Əsl oyunumuzu göstərə bilmədik. "Sumqayıt" qalib gəlmədi, biz məğlub olduq. 8 oyunluq qələbə seriyamız var idi. Hakimliklə bağlı müəyyən sözlər demək istəyirəm. "Şəki"yə hörmət göstərilməlidir. "Sabah" komandası kimi 10 matçda qalib gəlmişik. Ancaq bizə qarşı hörmət göstərmədiklərinin şahidi oluram. Hər matçda eyni problemləri yaşayırıq. Mən qalib gəldiyimiz zaman da bunu hakimlərə söyləmişdim. Ümid edirəm ki, artıq hamı bu məğlubiyyətimizlə rahatladı. Qələbə seriyamız bitdi. Biz mükəmməl komanda olmaya bilərik, ancaq mübarizkar bir komandayıq. Bunu da növbəti oyunlarda göstərəcəyik".

O, "Şəki"nin 2 uzunboylu oyunçusu – Ərcan Donat və Karl Consun 4-cü periodda 5-ci faulla kənarlaşdırılması barədə isə bunları deyib: "Bizim oyunçularımız faul edə bilər. Amma eyni hərəkətlərə görə fitin rəqib komanda əleyhinə çalındığını düşünmürəm. 26 dəqiqəyə bir komandaya cəmi 4 faulun verilməsi mümkün deyil. Bu, normal hal deyil".

Bedri Meriç növbəti turda "Gəncə" ilə liderlik matçı barədə də danışıb: "Açığı, lider və ya 2-ci olmaq çox önəmli deyil. İstənilən halda, pley-offa gedəcəyik. Mən əvvəl də söyləmişdim ki, liderlik dəyişə bilər. Çünki qrupumuzda "Ordu", "Gəncə" kimi yaxşı komandalar var. Biz oyunumuzla hörməti qazanmış komandayıq. Sadəcə, hamıdan eyni hörmətin bizə olunmasını istəyirik".

Qeyd edək ki, "Şəki" – "Sumqayıt" qarşılaşması qonaqların 98:93 hesablı qələbəsi ilə yekunlaşıb.