Azərbaycan Basketbol Liqasının XIII turunun NTD – "Neftçi" (105:100) oyunundan sonra məşqçilər fikirlərini bildirib.

Prosport.Az həmin fikirləri təqdim edir:

Tahir Baxşıyev (NTD): “Çətin bir oyun oldu. Son oyunlardan fərqli olaraq, çoxlu səhvlər etdik. Amma məhz belə oyunlarda komanda ruhu özünü göstərir. Uşaqları təbrik edirəm, çox yaxşı oyun göstərdilər. Qarşılaşma çox gərgin keçdi. Oyun ərzində bizim 10-11 xal üstünlüyümüz olurdu. Amma mübarizə gedirdi. “Neftçi” layiqli komandadır, onları yaxşı oyun münasibətilə təbrik edirəm. Bu, ardıcıl 3-cü qələbəmizdir. Davamı gətirməliyik. Növbəti oyun “Sabah”la olacaq. Çox çətin olacaq, amma biz hazır olacağıq. Hakimlikdən şikayət etmək istəməzdim. Liqada basketbol səviyyəsi çox yüksəlib. Sürətlər tamamilə dəyişib. Başa düşürəm ki, hakimlər üçün də çox çətin olub. Bu, təcrübə ilə gəlir. Hamının səhvi olur. Bizim də. Hər şeyi hakimlərin üstünə atmaq olmaz. Düşünürəm ki, gələcəkdə hakimlik daha da peşəkar olacaq”.

Daviti Çivçivadze ("Neftçi"): "Çox çətin oyun idi. Biz müdafiədə yaxşı oynadıq. Ancaq məlum oldu ki, oyunda qalib gəlməyə bu bəs eləmir. Bu mənə, həmçinin bütün komandaya bir daha onu sübut etdi ki, biz oyuna daha yaxşı hazırlaşmalıyıq, meydana daha hazır şəkildə çıxmalıyıq. Rəqib komandanı qələbə münasibətilə təbrik edirəm".