"Çox gözəl bir görüşü qələbə ilə tamamladıq. Rəqibi də bu oyuna görə təbrik edirəm".

Prosport.Az xəbər verir ki, bunu "Abşeron"un baş məşqçisi Ərhan Tokər "Sabah"la oyundan sonra deyib.

Türkiyəli mütəxəssis Azərbaycan Basketbol Liqasının XIII turunda qazanılan 67:59 hesablı qələbəni şərh edib: "Biz çox yaxşı yox, yaxşı oynadıq deyə bilərəm. Bərabər oyun sərgilədik. Ən önəmlisi bu idi. 2-ci dəfə "Sərhədçi" ilə oyundan sonra tam bir komanda şəklində mübarizə apardıq. Bu baxımdan da mövqeləri nəzarətdə saxlaya bildik. Rəqibimiz olduqca çox atış qaçırdı. Biz yaxşı müdafiə olunduq, amma onlar boşluq tapa bilirdi. Sadəcə, atışları istədikləri kimi olmadı. Bu gün ən önəmli məqam ribaundlarda rəqibin üstün olmasına icazə vermədik. Bütün oyunçularıma mübarizə və qələbəyə görə təşəkkür edir, onları təbrik edirəm".

Qeyd edək ki, bu qələbə "Abşeron"u 3-cü pilləyə yüksəldib.