Basketbol üzrə Azərbaycan Kubokunun 1/8 final mərhələsinin "Abşeron" – "Quba" oyunundan (96:94) sonra hər iki komandanın baş məşqçisi matçla bağlı fikirlərini bölüşüblər.

Prosport.Az xəbər verir ki, mütəxəssislər görüşün hakimliyindən narazı qaldıqlarını bildiriblər.

Ərhan Tokər ("Abşeron"un baş məşqçisi): "Bu oyunla bağlı çox söz deməyəcəyəm. Hər kəs olanları gördü. Qalib gəlsək də, çox yaxşı oynamadıq. Amma bir daha bu fikri səsləndirmək istəyirəm. Bu komandaya hörmət etmək vaxtı gəlib çatıb. Artıq bunu anlamalıdırlar. Mövsüm öncəsi bəlkə bizə yuxarıdan aşağı baxa bilərdilər, amma indi heç kimin belə haqqı yoxdur. Çempionatda da 3-cü pillədəyik və mübərizəmizi davam etdiririk. Təkrar edirəm, hörməti haqq edirik. Hakimlərdən, komandalardan, bir sözlə hər kəsdən bu diqqəti və hörməti gözləyirik".

Şəhriyar Əsgərov ("Quba"nın baş məşqçisi): "Hakimlərin bərbad idarəçiliyi, oyunu bilməməkləri nəticəyə təsir etdi. Sanki bu oyundan xəbərləri yoxdur. Özümüz də ilk dəfə idi ki, bu meydanda oynayırıq. Amma əsasən hakimlərin idarəçiliyi nəticəni belə duruma günə gətirdi. Hakim idarəçiliyi yaxşı olsaydı, növbəti mərhələyə adlayardıq. Biz kimdən zəifik ki? "Naxçıvan"a da müqavimət göstərəcəkdik. Amma hakimlik bərbad idi. Demirəm ki, hakimlər bilərəkdən edirdi, sadəcə bacarmırlar".

Qeyd edək ki, "Abşeron" 1/4 finalda "Naxçıvan"la qarşılaşacaq.