“Neftçi” ilə oynayacağımıza görə narahat olmamalıyıq”.

Prosport.Az xəbər verir ki, bunu “Sumqayıt”ın basketbolçusu Kolin Qolson deyib.

O, NTD-dən ayrıldıqdan sonra yeni kollektivdə özünü yaxşı hiss etdiyini vurğulayıb: “Artıq “Sumqayıt”da daha sərbəst oynayıram. Doğrusu, özümü burada ailənin bir üzvü kimi hiss edirəm. Komanda yoldaşları kimi bir-birimizi yaxşı anlayırıq. Çalışırıq ki, bir yerdə daha çox vaxt keçirək”.

Amerikalı basketbolçu bloqerlik fəaliyyətindən də danışıb: “Bəli, mən basketbol oynamaqla yanaşı, həm də bloqerliklə məşğulam. Sumqayıt və Bakıda çəkdiyim videoların belə çox ajiotaja səbəb olacağını gözləmirdim. Videolarıma insanlar tərəfindən çox fərqli reaksiyalar da gəlir. Bəyənənlər də olur, buna təəccüblənənlər də tapılır”.

Kolin Qolson sabah ölkə kubokunun 1/8 finalında qarşılaşacaqları “Neftçi” ilə bağlı fikirlərini də bölüşüb: “Neftçi” elə də güclü komanda deyil. Onlara qarşı oynamaq mümkündür. Onlar bizi daha çox təhlil etməlidir. Çünki “Sumqayıt” onlara daha çətin anlar yaşada bilər. “Neftçi” ilə oynayacağımıza görə narahat olmamalıyıq”.