“Naxçıvan” BK Azərbaycan Basketbol Liqasının XII turunda NTD-yə 70:95 uduzub.

Prosport.Az xəbər verir ki, hər iki komandanın baş məşqçisi açıqlama verib.

Murat Dikmən ("Naxçıvan"): "Bu gün həqiqətən də çox pis oyun sərgilədik. Həm müdafiədə, həm də hücumda matça köklənə bilmədik. Rəqibin 95 xalı da buna bariz numunədir. Müdafiədə çox pis çıxış etdik. Təəssüf ki, III dövrəyə yaxşı start vermədik. Ardıcıl olaraq həm "Neftçi"yə, həm də NTD-yə məğlub olduq. Həmçinin, bu komanda bundan öncə də liderliyə də yüksəlməyi bacarıb. Ümid edirəm ki, “Sərhədçi” ilə matça daha yaxşı köklənərik. Əskikliklərimizi aradan qaldırıb növbəti görüşə qalib gəlmək üçün çıxmalıyıq. Artıq bundan sonrakı qarşılaşmalarda xarakter nümayiş etdirməliyik. Bilirəm ki, bunu edəcək gücdəyik. Tezliklə özümüzə gəlib yolumuza davam etməliyik".

Tahir Baxşıyev (NTD): “Bu mövsüm çempionatda ən yaxşı oyunumuzu keçirdik. Amma inanıram ki, qarşıda bizi daha da yaxşı oyunlar gözləyir. “Naxçıvan” güclü komandadır. Onlar turnir cədvəlində 2-ci yerdə gedir. Amma bu qələbəyə çox ehtiyacımız var idi. Uşaqlar yalnız qələbə üçün oynadı. İlk hissədə çətin idi, hesab tez-tez dəyişirdi. Amma 3-cü periodda uşaqlar müdafiədə çox yaxşı oynadı. Bizim üçün bu vacib idi. Və qələbəni qazana bildik. Oyun keyfiyyətindən razı qaldım. Amma deyə bilərəm ki, hələ komanda tələblərimin yalnız 60%-ni yerinə yetirir. Biz hələ də inkişaf edəcəyik. Hazırda bizim üçün hər oyun vacibdir. Çempionata çox pis başladıq. Yaxşı ki, hələ qabaqda çox oyun var.
Qarşıda Kubok oyunu var və burada legioner limiti fərqlidir. Heyətdə ən azı 2 yerli oyunçu olmalıdır. Biz bu tərkibdə demək olar ki, oynamamışıq. Murad Babayev bizə kömək edə biləcəkmi, bilmirəm. Amma gənc oyunçularımız var. Düşünürəm ki, “Lənkəran”a qarşı yaxşı oyun göstərə biləcəyik”.