"Əvvəlki oyunlardakı ssenari yenə davam etdi".

Prosport.Az xəbər verir ki, bunu "Quba"nın baş məşqçisi Şəhriyar Əsgərov Azərbaycan Basketbol Liqasının XI turunda "Şəki" ilə matçdan (56:78) sonra bildirib.

Məşqçi heyətdə itkilər olduğunu deyib: "Heyətdə itkilərimiz var idi. Zaur Paşayev sağalmamışdı. Onun oynamaması komandanın yarısının olmaması deməkdir. Buna baxmayaraq, oyunçular sona qədər mübarizə apardı. Yeni transferimiz Ceyln Reynoldsun tibbi müayinədən keçmək üçün özünü çatdıra bilməməsi işimizi bir az çətinləşdirdi. Növbəti oyunumuz "Gəncə"yə qarşıdır. Bu matça qələbə üçün çıxacağıq. O vaxta Zaur da sağalar, Ceyln da oyuna çıxa bilər. Yəqin ki, tam başqa oyun olacaq. Nə "Gəncə", nə də "Şəki" qalib gələ bilməyəcəyimiz komandalardır. Bunu 3 hissə göstərdik. Sadəcə, heyətin kasadlığı sözünü dedi".