Azərbaycan Basketbol Liqasının XI turunda "Ordu" "Sumqayıt"a 89:82 qalib gəlib.

Prosport.Az xəbər verir ki, oyundan sonra hər iki komandanın baş məşqçisinin fikirlərini təqdim edir: 

Vadim Kuramşın ("Sumqayıt"): "Oyunun əvvəlində komanda kimi təsir bağışlamadıq. Basketbolçularımız fərdi oyuna üstünlük verdi. Buna baxmayaraq, 19 xal fərqilə geridə olsaq da, vəziyyəti düzəldə bildik. Müdafiə taktikamızı dəyişdik, komanda oyunu oynamağa başladıq. Təəssüf ki, hesabı bərarləşdirmək üçün son atışlarımız alınmadı. Hakimlikdən narazı qaldım. Onların zəif idarəçiliyi nəticəyə təsir göstərdi. Biz cəmi 4 legionerlə yaxşı oynayırıq. Nəzərə alaq ki, yeni heyətin anlaşma səviyyəsi o qədər də yüksək deyil. Bu problemlərlə normal oynayırıqsa, hakimlər belə səhvlər edəndə təbii ki, özümüzə gələ bilməyəcəyik".

Alberto Blanko ("Ordu"): “Əvvəlcə bu qələbə münasibəti ilə komandamı təbrik edirəm. İlk 2 periodu yaxşı oynadıq. Hesabda müəyyən fərq yaratdıq. Ancaq 3-cü periodda zəif təsir bağışladıq. Həmin periodda 20 xal öndə idik. Ancaq rəqib kortəbii və şablon taktika ilə oynamasına baxmayaraq, müdafiədəki səhvlərimizdən istifadə edərək 20 xal qazandı. 4-cü hissədə də 10 xal öndə idik, ancaq yenə də müdafiədə səhvlərimiz oldu. Bununla belə, oyunda dönüş yaratmaq istəyən rəqibə bu imkanı vermədik. İlk növbədə startda yaxşı başlayıb, sonrakı hissələrdə zəif oyunumuzu düzəltməli, səhvlərin üzərində işləməliyik. Ardıcıl 4 qələbə qazandıq və buna görə sevinirəm. Qarşıda 3 vacib oyunumuz var, onlara hazırlaşacağıq. Çünki bu oyunların çempionatın nəticəsinə ciddi təsiri olacaq".