B qrupunun lideri "Şəki" basketbol komandası ABL-in III dövrəsinə də qələbə ilə başlayıb.

Prosport.Az-ın xəbərinə görə, XI turun Şəki Olimpiya Kompleksində keçirilən görüşündə meydan sahibləri "Quba"ya II dövrədə olduğu kimi, yenə 22 xal fərqlə qalib gəlib.

Fasiləni öndə bitirən qonaqlar 2-ci hissədən sonra meydan sahiblərinin hücumlarının qarşısını ala bilməyib. Nəticədə "Şəki" 78:56 qalib gəlib. Bununla da "Şəki" ardıcıl 7-ci qələbəsini qazanıb.

Qeyd edək ki, xallarını 20-yə yüksəldən "Şəki" liderliyini qoruyub saxlayıb. "Quba" isə 14 xalla 5-ci sırada qalıb.

Turun Lənkəranda eyni vaxtda başlayan digər görüşündə də sürpriz qeydə alınmayıb. "Gəncə" "Lənkəran"a 79:66 hesabı ilə qalib gəlib. "Lənkəran" 13 xalla sonuncu – 6-cı, "Gəncə" isə 19 xalla 2-cidir.

Xatırladaq ki, turun əvvəlki görüşlərində A qrupunda "Sabah" "Sərhədçi"ni 85:78, NTD "Abşeron"u 87:77, "Neftçi" "Naxçıvan"ı 73:63 hesabı ilə məğlub edib. B qrupunda isə "Ordu" "Sumqayıt" üzərində qələbə qazanıb – 89:82.