Azərbaycan Basketbol Liqasının XI turunda lider "Naxçıvan" "Neftçi"yə 63:73 uduzub.

Prosport.Az oyundan sonra hər iki komandanın məşqçisinin fikirlərini təqdim edir: 

Murat Dikmən (“Naxçıvan”): "Həqiqətən də çox pis oynadıq. Mən heç vaxt məğlubiyyəti hakimlərlə əlaqələndirmirəm. Ancaq hakimlər bu matçda çox pis performans sərgilədi. Bizim oyunumuz da yaxşı deyildi. Top itkilərimiz, hücumda zəif çıxışımız, müdafiə ribaundlarında yetəri qədər aqressiv olmamağımız və bunların hamısı bizim əleyhimizədir. Bu hissədə isə hakimi günahlandıra bilmərəm. Rəqib komandanın 27 foul atışı etdiyini ilk dəfədir ki, görürəm. Bu çox maraqlı bir haldır. Yəni 27 foul atışı edən komanda çox güman ki, həmin həftə taktikadan başqa, sərbəst atış üzərində də çalışıb. Bu tənqid mənim şəxsi fikrimdir. Biz öz səhvlərimizi bilirik. Bu barədə əlavə olaraq çalışacağıq. Son olaraq da hakimlərimizə məsləhətim odur ki, bu matçı izləyib özlərini tənqid etməyi bacarsınlar".

Daviti Çivçivadze ("Neftçi"): "Oyunçulara, komanda heyətinə və kluba təşəkkür edirəm, çox böyük iş gördülər. Oyunçularımız isə bu gün əsl xarakter nümayiş etdirdi və nəticədə qələbə qazandıq. Onları həm göstərdikləri oyuna, həm də qazanılan qələbəyə görə təbrik edirəm. Rəqib komandaya da yaxşı oyun göstərdiklərinə görə təşəkkür edirəm. İnanıram ki, bu cür davam edə bilsək, gələcək oyunlarda uğurlarımız bol olacaq".