NTD komandası Azərbaycan Basketbol Liqasının XI turunda gözlənilmədən "Abşeron"a 87:77 qalib gəlib.
Prosport.Az hər iki komandanın baş məşqçisinin fikirlərini təqdim edir:
Tahir Baxşıyev (NTD): "Yaxşı oynadıq. Oyunçuları və azarkeşləri qələbə münasibətilə təbrik edirəm. Güclü rəqibə qarşı oynadıq. Oyuna yaxşı nəzarət etməyimiz məni sevindirir. Xüsusilə matçın sonunda. Oyun ritmini itirmədik. Oyunda az səhvlərə yol verdik. Bu çox yaxşıdır. Məşq edəcəyik, hazırlaşacağıq və inkişaf edəcəyik. Ümid edirəm ki, gələcəkdə bizi daha çox qələbələr gözləyir".
Ərhan Tokər ("Abşeron"): "İlk olaraq onu qeyd edim ki, əsas oyunçumuz Ceyln Şou sıralarımıza geri dönsə də, cəmi 1 məşqdə özünü sınamaq şansı olmuşdu. Bu matçda toparlanıb oynamağa çalışdı. Gənc oyunçularımız (Məhəmməd Hüseynli və İsmayıl Abdullayev) ilk yarıda pis təsir bağışladı. Rəqib onları təzyiq altında saxladı və uğursuz atışlardan sonra xal fərqi yaranmağa başladı. Bu, NTD-də özgüvəni artırdı, bizdə isə əksinə oldu. Mental olaraq çöküş yaşadıq. Sona doğru rəqibin etdiklərinə reaksiya verməyə başladıq. Maqa (Məhəmməd Hüseynli) yaxşı oynamağa başladı. Həm müdafiədə, həm də hücumda bizə fayda verirdi. Buna baxmayaraq, fərqi qapada bilmədik və məğlub olduq. Başqa bir səbəb kimi yeni ilin ilk ayında ardıcıl oyunların keçirilməsini göstərə bilərəm. İstədiyimiz kimi məşq etməyə zamanımız yetmir. Yəni, nələrisə dəyişdirəcək, inkişaf etdirəcək vaxtımız çox olmur. Heç nə edə bilmərik. Mövsümün bu hissəsi bizim üçün çətin oldu. Bir də bir məsələ haqqında fikir bildirmək istəyirəm. Komandamız gənclərin olduğu, aşağı büdcəli komandadır. Bizə sanki yuxarıdan aşağı baxırlar. Mən elə düşünürəm. Hakimlər tərəfindən də verilən qərarlarda bunu hiss edirəm. Yanıla da bilərəm. Bu oyunda biz pis oyun sərgiləyə bilərik, amma matçın çox da yaxşı idarə edildiyini deyə bilmərəm. Sanki bizim əleyhimizə çox qərar verildi. Bunu kimsə bilə-bilə edir demirəm. Sadəcə bariz şəkildə bizim lehimizə olan foullarda istədiyimiz qərar verilmirdi. Bu bəlkə də bizim oyunçularımızın bədən dilindən qaynaqlanır. Hakimləri bu da çaşdıra bilər. Bütün bunları kənara qoysaq, deyə bilərəm ki, komandamız toparlanacaq və yenidən qələbələr qazanacaq. Bu matça görə rəqib NTD komandasını təbrik edirəm".