Basketbol üzrə Azərbaycan Kubokunda püşkün vaxtı bəlli olub.

Prosport.Az-ın xəbərinə görə, 2025-ci il mövsümünü üçün Azərbaycan Kubokunun püşkü yanvarın 21-də atılacaq.

Federasiyanın icraçı vitse-prezidenti Fərrux Mahmudovun saytımıza verdiyi açıqlamaya görə, püşkatma Azərbaycan Basketbol Federasiyasının "YouTube" kanalı vasitəsilə canlı göstəriləcək.

Qeyd edək ki, reqlamentə əsasən Azərbaycan Basketbol Liqasının 2024/25 mövsümünün II dövrəsindən sonra A qrupunda ilk 3 sırada olan komandalar – "Naxçıvan", "Sabah" və "Sərhədçi", o cümlədən B qrupunun lideri "Şəki" birbaşa 1/4 finaldan mübarizəyə qoşulacaq.

"Abşeron", "Neftçi", NTD, "Gəncə", "Ordu", "Sumqayıt", "Quba" və "Lənkəran" komandaları isə 1/8 finalda oynayacaq. 1/8 final oyunları 28-29 yanvar tarixlərində keçiriləcək. 1/4 final, yarımfinal və final martda baş tutacaq. İlkin təqvimə əsasən finalın martın 16-da keçiriləcəyi gözlənilir.

Reqlamentə əsasən, 1/4 finaldan etibarən bütün oyunlar Bakıda baş tutacaq. Ölkə kuboku oyunlarında çempionatdan fərqli olaraq, daha çox yerli basketbolçunun meydanda çıxmasına şərait yaradılacaq. Belə ki, 3+2 (3 legioner, 2 yerli) limiti tətbiq olunacaq.