“Əslində bu oyuna çox yaxşı hazırlaşmışdıq. Onların zəif cəhətlərini bilirdik".

Prosport.Az xəbər verir ki, bu sözləri "Sərhədçi”nin baş məşqçisi Evrən Alkaya deyib.

Türkiyəli mütəxəssis Azərbaycan Basketbol Liqasının son turunda "Sabah"a 78:85 hesabı ilə uduzduqları oyunu şərh edib: "Müdafiədən istifadə edib hücum şanslarımızı dəyərləndirə bilmədik. Çox bəsit hücum xətaları etdik. Həqiqətən bundan öncəki matçdan daha yaxşı oynadığımızı düşünürəm. Daha güclü idik, daha estetik çıxış etdik. Epizodlarımızı doğru dəyərləndirə bilmədik. Uzun basketbolçularımızdan istədiyimizi ala bilmədik. Düzdür, Ənvər Asanov hardasa bir az effektiv oldu. Amma bəzi oyunçularımız yaxşı günündə olsa da, digərləri çox bəsit səhvlər etdilər. Ötürmələrdə səhvlər oldu. Edəcək bir şey yoxdur".

O, oyunçuların əllərindən gələni etdiklərini söyləyib: "Matçın sonlarına yaxın önə keçdik, orda vəziyyəti qoruyub saxlamalı idik. Amma rotasiya səhvləri ilə üstünlüyü əldən verdik. Təəssüf ki, olmadı. Uşaqları təbrik edirəm, əllərindən gələni etdilər. “Sabah” yaxşı büdcəyə malik güclü komandadır. Amma biz də yavaş-yavaş inkişaf edirik. Ümid edirəm ki, pley-off başlayana qədər komandanı ən üst səviyyəyə gətirəcəyik. 2 oyunçu xəstə olduğu üçün məşqlərə qatılmırdı. Tam gücümüzlə çıxış edə bilmədik. “3-lük”lərdə də çox keyfiyyətli olmadıq. Bir az daha yaxşı oynasaydıq, qazanardıq. “Sabah” vacib matçlardan birini qazandı. Bu mövsüm bitmədən onları məğlub etmək istəyirik. Yaxşı komandaya qarşı yaxşı oynadıq. Bəsit səhvlər etdik və məğlub olduq. Bu səhvlərin nəticəsi bizim üçün böyük oldu. Ya səhv etməyəcəksən, ya da bunu edib matçı uduzacaqsan. 2-cisi oldu. Komandama uğurlar, daha yaxşı olacağıq”.