Bakının Xətai rayonunda, metronun Həzi Aslanov stansiyası ərazisindəki məşq zallarından birində bədbəxt hadisə baş verib.

Prosport.Az xəbər verir ki, 15 yaşlı Əli Mansurov 27 yaşlı kişi ilə döyüşə çıxarılıb. Güclü rəqibin vurduğu zərbədən yeniyetmənin beyni silkələnib.

Əlinin anası Aytən Əhmədovanın sözlərinə görə, oğlu həmin zalda idmana yeni başlayıbmış. Heç bir qoruyucu olmadan məşqçi onu 12 yaş böyük kişi ilə döyüşdürüb. 

"Evə gələndə Əlinin gözünün altında, böyrəyində göy izlər var idi. Sanki uşaq küçə döyüşündən çıxmışdı. Yediyini qaytarırdı. Həkimə apardım, müayinədən sonra məlum oldu ki, başında anadangəlmə "kista" var. Zərbədən sonra ora qan yığılıb.

Bundan sonra zala getməsinə icazə vermədim. Hadisədən 1 aydan çox bir müddət keçəndən sonra Əli yenidən qaytarmağa, başı ağrımağa başladı. Nevropatoloqlara apardım. MRT-dən keçirəndən sonra əməliyyat edilməli olduğunu bildirdilər, çünki artıq beyninə qan sızırdı. 19 noyabr tarixində əməliyyat olundu", – o, "AzVision"a bildirib.

Məşqci qadın olduğu üçün Aytən Əhmədova polisə şikayət etməyib. Ətrafındakıların təkidlərinə baxmayaraq, etirazlını məşqçiyə bildirməklə kifayətlənib. Amma aradan keçən müddət ərzində məşqçi qadın bir dəfə də olsun Əlinin səhhətilə maraqlanmayıb.

O, bütün valideynlərə məsləhət görür ki, uşaqlarını qeyri-peşəkarların yanına göndərməsin. Məşqçilər isə məsuliyyətli olsun, uşaqlara öz övladları kimi davransınlar.