“Hakimlik haqqında danışmaq istəmirəm. Bu mənim səviyyəm deyil. Amma bəzi məqamları da qeyd etmək lazımdır".

Prosport.Az xəbər verir ki, bunu "Sabah" basketbol komandasının baş məşqçisi Rimas Kurtinaytis deyib. 

O, bu gün III dövrənin açılışı oyununda “Sərhədçi” BK-ya 85:78 hesabı ilə qalib gəldiyi oyundan sonra fikirlərini bildirib:

"Oyun ərzində rəqib 38, biz isə 20 sərbəst atış yerinə yetirdik. Bizim yerinə yetirdiyimiz sərbəst atışlar oyunun sonlarında qeydə alındı. Buna da səbəb rəqibin son 5 dəqiqədə aşırı aqressiv oyunu idi. Düşünürəm ki, liqanın səviyyəsinin artması klublarla yanaşı, həm də hakimliyin inkişafından asılıdır. Basketbolçularımız bu oyunda xarakter nümayiş etdirdi. Bilirik ki, çempionluğu qorumaq onu qazanmaqdan daha çətindir. Çempiona qarşı mübarizə aparmaq isə rəqibləri həmişə ikiqat motivasiya edir. Yeni oyunçumuzun fiziki göstəricilərini bəyənirəm. Hətta deyərdim ki, Avroliqa standartlarına uyğundur. Heyətimiz yenilənir. Bu isə uzunmüddətli planlar qurmağımıza çox kömək edir”.