Azərbaycan Basketbol Liqasının IX turundan təxirə salınmış "Sumqayıt" - "Quba" oyunundan (126:90) sonra hər iki komandanın baş məşqçisi fikirlərini bölüşüb.

Prosport.Az xəbər verir ki, hər iki mütəxəssis nəticəni şərh ediblər:

Şəhriyar Əsgərov ("Quba"nın baş məşqçisi): "Sumqayıt"ı təbrik edirəm. Heyəti gücləndiriblər. Tamamilə başqa basketbol oynadılar. Bizim də gücümüz buna çatdı. Çünki əsas heyətlə bağlı problemlərimiz var. Zaur Paşayevin hərarəti yüksək, Andrey Kondratyev zədəli idi. Rotasiyanın geniş olmaması öz sözünü dedi. Hesab oyuna görə deyildi. Rəqibin uğurlu atışları çox oldu. Bunu gözləmirdik. Gələcək matçlarda uğurlu olmağa çalışacağıq".

Vadim Kuramşın ("Sumqayıt"ın baş məşqçisi): "Bütün uşaqları təbrik edirəm. Meydanda olan hamı möhtəşəm oynadı. Əsl komanda oyunu sərgilədik. Yeni oyun qurucunun gəlişi işimizə yaradı. Saadettin Donat da az fol etməklə öz işinin öhdəsindən məharətlə gəldi. Müdafiədə əla idi. 41 xal toplayan Zayon Yanq da əla  snayper olduğunu bir daha sübut etdi. Amma digərləri də məhsuldar oynadı.  Ümid edirəm, ardıcıl qələbələrlə turnir cədvəlində mövqeyimizi daha da yaxşılaşdıracağıq".