"İlk pillədə olmağa layiq komandayıq".

Prosport.Az xəbər verir ki, bunu "Naxçıvan"ın baş məşqçisi Murat Dikmən "Abşeron"a qarşı Azərbaycan Basketbol Liqasının IX turunun təxirə salınmış oyunundan sonra deyib.

Mütəxəssis klubun mətbuat xidmətinə açıqlamasında qələbəyə görə sevincli olduqlarını bildirib: "Hər şeydən əvvəl "Abşeron"u təbrik edirəm. Həqiqətən yaxşı mübarizə apardılar. Onların bu mövsüm missiyası gəncləri yetişdirmək, həm də çempionatda yaxşı oyun sərgiləməkdir. Bunu da bacarırlar. Rəqib komandanın baş məşqçisi Ərhan Tokəri və kollektivini təbrik edirəm. Bu gün turnir cədvəlində lider mövqeyindəyik. İlk pillədə olmağa layiq komandayıq. 1-ci yarıda həqiqətən yaxşı oynadıq. Amma sevincimizi bu gün (dünən – red.) yaşayacağıq, sabahdan (bugündən – red.) etibarən isə növbəti həftə oynayacağımız "Neftçi" ilə matça hazırlaşacağıq. Önəmli olan ilk yarını yox, mövsümü lider bitirməkdir. 2-ci yarıda kubok və pley-off görüşləri də var".

Qeyd edək ki, "Naxçıvan" – "Abşeron" qarşılaşması 1-cilərin 102:82 hesablı qələbəsi ilə yekunlaşıb.