Azərbaycan Basketbol Liqasının X turunda "Gəncə" evdə "Sumqayıt"a 98:79 hesabı ilə qalib gəlib.

Prosport.Az xəbər verir ki, hər iki komandanın baş məşqçisi matçla bağlı fikirlərini bölüşüb.

Vadim Kuramşın ("Sumqayıt"ın baş məşqçisi): "Əvvəlcə "Gəncə"ni qələbə münasibətilə təbrik edirəm. Həqiqətən də yaxşı komandadır. Onlar mövsümün əvvəlindən heyəti komplektləşdiriblər. Ona görə komanda kimi yaxşı oynayırlar. Biz isə heyəti yeniləyirik. 2 yeni legionerimiz ilk oyununa çıxdı. Onların hərəsi yaxşı statistika ilə yadda qaldı. Komanda halında oyunumuz alınmadı. Hələ də meydanda 3 legioner və 2 yerli basketbolçu ilə oynamağa məcburuq. Bu, həm də fol limiti ilə üzləşməyimizlə nəticələnir.  Ümid edirəm ki, transfer edəcəyimiz yeni legionerlərlə vəziyyətdən çıxa biləcəyik".

Halil Atlı ("Gəncə"nin baş məşqçisi):  "Hər şeydən əvvəl rəqibi göstərdiyi oyuna görə təbrik edirəm. Heyətlərində gedən və gələn oyunçular var. Bizimlə görüşə də tam heyətlə gələ bilməmişdilər. Özümüzə gəlincə, rotasiya ilə oynadıq. Basketbolçulara oynamaq üçün şans verdik. Görüşə nəzarəti əlimizdə saxladıq. Qarşıda "Şəki" ilə matç var. Qələbə qazanmağa davam etmək istəyirik. Komandamı da təbrik edirəm. Ayrıca olaraq zala gələn azarkeşlərimizə də təşəkkürü bildirirəm. Onların dəstəyi bizə güc verir. Fanatlarımız üçün mübarizə aparırıq. Bu dəstəyin artaraq davam etməsini istəyirik".