Bu il Azərbaycanda keçiriləcək MDB Oyunlarında futbol yarışları Qəbələdə keçiriləcək.

Prosport.Az-ın xəbərinə görə, 16 yaşadək futbolçular arasında keçiriləcək futbol turniri infrastrukturunun gözəl olması nəzərə alınaraq Qəbələ şəhər stadionuna salınıb.

Bundan başqa, cüdo yarışları Göygöldə (burada ardıcıl 2 ildir ki, cüdo üzrə yeniyetmələr arasında Avropa Kuboku keçirilir), klassik voleybol matçları Tərtərdə, çimərlik voleybol oyunları Yevlaxda, akademik avarçəkmə, kayak və kanoe üzrə reqata isə Mingəçevirdə keçiriləcək.

Daha əvvəl isə kamandan oxatma yarışlarının Xankəndi şəhərində baş tutacağı bəlli olmuşdu. 

Qeyd edək ki, bu ilin payızında keçiriləcək III MDB Oyunlarının ev sahibi rəsmi olaraq Gəncə qəbul edilsə də, turnir digər 13 şəhərimizdə də keçiriləcək. Bunlar Xankəndi, Mingəçevir, Qəbələ, İsmayıllı, Şəki, Şəmkir, Tovuz, Qazax, Göygöl, Yevlax, Oğuz, Tərtər və Goranboydur.

Budəfəki MDB Oyunlarının proqramına isə bu idman növləri daxildir: akademik avarçəkmə, kanoe, atletika, badminton, basketbol (3x3), gimnastika (batut və bədii gimnastika), boks, breykinq, çövkən, cüdo, futbol, atıcılıq (stend və güllə atıcılığı), həndbol, kamandan oxatma, karate, mas-reslinq, güləş (sərbəst, yunan-Roma və qadın güləşi), qılıncoynatma, sambo, stolüstü tennis, taekvondo, üzgüçülük, velosiped, voleybol (klassik və çimərlik voleybolu), paracüdo, parakarate, parataekvondo, paraüzgüçülük.