"Basketbolçularımız möhtəşəm oyun nümayiş etdirdilər".

Prosport.Az xəbər verir ki, bunu "Naxçıvan"ın baş məşqçisi Murat Dikmen "Sabah"a qarşı Azərbaycan Basketbol Liqasının X turunun oyunundan sonra klubun mətbuat xidmətinə açıqlamasında deyib.

Türkiyəli mütəxəssis qalib gəldikləri görüş barədə danışıb: "Oyunçularımı qələbə münasibəti ilə təbrik edirəm. Möhtəşəm oyun nümayiş etdirdilər. Ehtiyatda olan qarşılaşmada qalib gələ bilsək, turnir cədvəlində liderliyə yüksələcəyik. "Sabah"la matça yaxşı hazırlaşmışdıq. Əvvəlki görüşdə təəssüf ki, son saniyə atışı ilə hesabda geriyə düşmüşdük. Etdiyimiz üç atış da uğursuz olduğu üçün uduzmuşduq. Amma bu gün üç oyunçumuz əla xarakter göstərdilər. "Naxçıvan" komandası çempionata rəng qatır. Çünki yaxşı və mübarizəli basketbol oynayırıq. Mövsümün sonunda çempionatda və ölkə kubokunda uğur qazanmaq istəyirik".

"Sabah"ın baş məşqçisi Rimas Kurtinaytis isə müdafiədə fərdi səhvlər buraxdıqlarını və bunun da hesabda əksini tapdığını vurğulayıb: "Rəqib layiqli qələbə qazandı. Adətən oyunda üstünlük bizim tərəfimizdə olsa da, bu dəfə gedişata diqtə edən tərəf onlar idi. Görüşün əvvəli bərabər səviyyəli keçdi. Daha sonra rəqib hesabda önə çıxarkən oyunumuzda tələskənliyə yol verdik. Unutmaq lazım deyil ki, qarşılaşma 10 yox, 40 dəqiqədir. Müdafiədə fərdi səhvlər buraxdıq, bu isə hesabda əksini tapdı".

O, yeni transferlərin çıxışları barədə danışıb: "Yeni transfer olunan basketbolçuların keyfiyyətli oyun nümayiş etdirdiklərini söyləyə bilərik. Lakin oyun fəlsəfəmizə uyğunlaşmaq üçün zamana ehtiyac var. Basketbol intellekti yüksəkdir. Düşünürəm ki, bizim üçün faydalı olacaq”.

Qeyd edək ki, "Sabah" - "Naxçıvan" qarşılaşması qonaqların 80:75 hesablı qələbəsi ilə yekunlaşıb.