“Bura gəlişimdə məqsəd komandaya kömək etməkdir”.

Prosport.Az xəbər verir ki, bunu “Sabah” klubunun basketbolçusu Trey Sampson klubun mətbuat xidmətinə müsahibəsində deyib.

24 yaşlı hücumçu Bakı təmsilçisinə transferini şərh edib. 1 gün öncə növbəti mövsümün sonuna kimi müqavilə imzalayan Sampson bildirib ki, gəlməzdən əvvəl “Sabah” haqqında məlumat toplayıb: “Milad bayramından öncə menecerim mənə zəng vuraraq “Sabah” klubunun xidmətimdə maraqlı olduğunu bildirdi. Mən də bu keçidə razılıq verdim. “Sabah”da bir neçə oyunçunu tanıyıram. Misal üçün: Hassani Qravet, Trevon Duval. Transferdən öncə Duvalla əlaqə saxlamışam. Onunla bir komandada çıxış edəcəyimə görə şadam. Komandanın avrokubok görüşlərini izləmişəm. Çətin oyunlar oldu. “Sabah” azarkeşlərinə demək istərdim ki, bizi izləməyə davam etsinlər, onları sevindirməyə çalışacağıq”.

Qeyd edək ki, amerikalı oyunçunun son klubu İsveçrə “Luqano"su olub.