Növbəti il Azərbaycanda təşkil olunacaq III MDB Oyunlarında Xankəndidə hansı idman növü üzrə yarışın baş tutacağı bilinib.

Prosport.Az-ın əldə etdiyi xəbərə görə, keçmiş adət-ənənələrimizi əks etdirdiyi üçün kamandan oxatma yarışının məhz erməni işğalından azad edilmiş Xankəndi şəhərində keçirilməsi qərara alınıb.

Oktyabrın sonları – noyabrın əvvəllərində keçiriləcək MDB Oyunlarının kamandan oxatma yarışları Xankəndi şəhər stadionunda baş tutacaq. Bu, 1956-cı ildən istifadəyə verilmiş Xankəndi şəhər stadionunda keçiriləcək ilk beynəlxalq yarış kimi tarixə düşəcək.

Qeyd edək ki, işğaldan azad olunduqdan sonra Xankəndidə daha əvvəl 3 yarış baş tutub. Sözügedən şəhərdə ilk idman yarışı ötən ilin dekabrın 21-də futbol üzrə Azərbaycan Kubokunun 1/8 finalı çərçivəsində "Qarabağ"la MOİK komandaları arasında keçirilib. Bu il fevralın 29-da Xankəndidən Bakıya ultramarafon yarışı start götürüb. Bu ay isə 50 ildən sonra Xankəndidə badminton üzrə ölkə çempionatı keçirilib.

Səbuhi Musa