Yeni ilin ilk həftəsində basketbol üzrə FIBA Çempionlar Liqasının pley-off görüşləri keçiriləcək.

Prosport.Az fanat.az-a istinadən xəbər verir ki, görüşlərdən biri Azərbaycanda baş tuta bilər. 

Belə ki, püşkün nəticəsinə əsasən Türkiyə təmsilçisi "SOCAR Petkimspor"a rəqib olan İsrailin "Hapoel Holon" komandası məlum səbəbə görə İstanbula gəlmək istəmir. Belədə görüşün neytral meydanda – Azərbaycanda keçirilməsi təklif olunub. 

Bu barədə artıq Azərbaycan Basketbol Federasiyasına da məlumat verilib. Qurumun icraçı direktoru Fərrux Mahmudov fanat.az-a bu barədə açıqlama verib: "Məlumatımız var. Bu həftə ərzində hər şey dəqiqləşəcək. Hələ heç nə tam bəlli deyil. Əlbəttə, arenalarımız beynəlxalq oyunları qəbul etmək baxımından tələblərə cavab verir. Burada Avropa Kuboku oyunları olub. O cümlədən, dünya çempionatın təsnifat mərhələsinin görüşləri keçirilir. İnşallah, yaxşı olar. Bu həftə hər şey dəqiq bilinəcək".   

Artıq "CBC Sport"a da bu barədə şifahi məlumat verilib. Telekanalın baş redaktoru Şəmsəddin Abbasov bu barədə belə deyib: "Federasiyadan əlaqə saxlayıb təqvimdə boş yerin olub-olmaması ilə maraqlandılar. Yəni, yayımla bağlı şifahi danışıq, müzakirə oldu. Sadəcə, yaxın günlərdə beynəlxalq qurumdan rəsmi müraciət olmalıdır, müqavilə bağlamalıyıq. Yəqin ki, tezliklə bu məsələyə aydınlıq gətiriləcək. Dəqiqləşən kimi, sosial şəbəkə hesabımız vasitəsilə anons edəcəyik". 

Qeyd edək ki, tərəflər arasında ilk matç yanvarın 7-də, cavab görüşü isə 14-də keçiriləcək. İlk qarşılaşmaya Türkiyə təmsilçisi ev sahibliyi edəcək.