Azərbaycan Basketbol Liqasının "Sumqayıt" – "Şəki" görüşündən (66:89) sonra hər iki komandanın baş məşqçisinin fikirləri məlum olub.

Prosport.Az onların fikirlərini təqdim edir:

Vadim Kuramşın ("Sumqayıt"): "Əvvəlcə, rəqibi qələbə münasibətilə təbrik edirəm. "Şəki" bizdən fərqli, daha komplektləşmiş komandadır. Komandamızda heyətlə bağlı ciddi problemlər var. Limit 4-1-dir, biz 3-2 ilə oynayırıq. Bütün bunlar nəticəyə mənfi təsir göstərir. Hər oyunda eyni problemlərlə üz-üzə qalırıq. Ümid edirəm ki, qış fasiləsində biz heyətimizi gücləndirə biləcəyik. İndiki məqamda "Sumqayıt"ın ən böyük problemi Saadettin Donatın faul limitindən əziyyət çəkməsidir. Elə ki o ehtiyat oyunçular skamyasına əyləşir, oyun dağılır. Düz 3 aydır ki, biz bunun əziyyətini çəkirik. Bizim Donatı əvəzləyəcək oyunçumuz yoxdur. İlk hissədə rəqiblə başabaş oynadıq. 3-cü periodda Saadettin faulları sıralayınca, nəzarəti itirdik. Rəqib ribaundlarda bizi üstələdi. Bir də ki, Aleks Koldvelli saxlaya bilmədik".

Bedri Meriç ("Şəki"): "Əvvəla, oyunçularımı bu qələbəyə görə təbrik edirəm. Çünki son 7 gündə 3 səfər matçına çıxıb, qalib gəldik. Bizdən başqa belə oyun təqviminə malik komanda yoxdur. Oyunçularım bu 3 səfər matçında güclü xarakter nümayiş etdirdi. Sumqayıta da qələbəyə inanaraq gəlmişdik. Açığı, ilk hissədə yaxşı müdafiə oluna bilmədik. Ancaq fasilədən sonra müdafiəni yaxşı qurub böyük fərqlə qalib gəldik.

Açığı, heç kim bizim bu qədər xal toplayacağımızı gözləmirdi. Növbəti turdakı rəqibimiz "Gəncə" çox yaxşı komandadır. Şəkidə oynayacağımızdan, sonadək mübarizə aparacağıq. Qalib gəlsək, qrupda lider olacağıq.

Yeni transferimiz Terens Hanter-Vitfild çox istəklidir. Hamı bayrama görə Vətəninə qayıdanda, o, Azərbaycana gəlmək istədiyini bildirdi. Dekabrın 27-si Azərbaycana gələcək. Yanvarda "Lənkəran"la səfərdə keçirəcəyimiz matçda meydanda olacaq".