“Bu qələbələr bizim üçün çox önəmli oldu. Çünki mövsümə çox pis start verdik, ardıcıl məğlubiyyətlər sıralandı. Yeni oyunçuların gəlməsi, komandada bəzi dəyişikliklərin həyata keçməsi bizim çıxışımıza müsbət təsir göstərdi”.

Prosport.Az xəbər verir ki, bunu Azərbaycan Basketbol Liqasının VIII turunun “Sumqayıt” – “Şəki” görüşündən əvvəl meydan sahibi komandasının mərkəz oyunçusu Saadettin Donat deyib.

Donat son vaxtlar öz çıxışında müəyyən problemlər olduğunu da etiraf edib: “Oyunumda ən böyük nöqsan hər matç faul problemi ilə üzləşməyimdir. Bunun da öz obyektiv səbəbləri var. Çünki əsasən əvəzlənmədən oynayıam. Hər epizod uğrunda mübarizə aparıram. Bu da tez-tez bir matçda faul limitini doldurmağımla nəticələnir”.

Saadettin Donat bu tur “Şəki” ilə oyunda qardaşı Ərcan Donata qarşı oynayacağına görə həyəcanlı olduğunu söyləyib: “İlk dövrədə “Lənkəran”la matçda zədələndiyimdən, III turda səfərdə “Şəki”yə qarşı oynaya bilmədim. Həmin oyunda da 40 xal fərqi ilə uduzmuşduq. Bu dəfə “Şəki”yə qarşı meydana çıxacağam. Bu görüş həm də mənim üçün böyük önəm kəsb edəcək. Çünki karyeramda ilk dəfə qardaşım Ərcana qarşı oynayacağam. Buna görə çox həyəcanlıyam”.