“Son 4 qarşılaşmada aparıcı basketbolçularımızın zədələnməsi oyun planında bizə müəyyən problemlər yaratsa da, Hassani Qravett kimi görüşün gedişatını dəyişə biləcək oyunçunun yenidən heyətə qayıtması məni sevindirməyə bilməz".

Prosport.Az xəbər verir ki, bunu "Sabah" basketbol komandasının baş məşqçisi Rimas Kurtinaytis deyib. 

Litvalı məşqçi “Abşeron” komandası üzərində qələbədən sonra fikirlərini bildirib: "Qarşılaşmanın son dəqiqələrindən razı qalmadım. Oyuna ehtiyatdan daxil olan yerli basketbolçular daha çox oyun dəqiqələri qazanmaq istəyirlərsə, daha yaxşı çıxış etməlidir.

Ümumi götürsək, yaxşı çıxış etdik. Fərdi olaraq Endər Poladxanlının əvvəlki formasına qayıtması üçün zamana ehtiyacı var. Andrey Voynaloviç son 1 ayda hər oyunda 35 dəqiqə mübarizə aparıb. Hiss edirəm ki, bir qədər yorulub. Yeni il öncəsi son oyunumuz qalıb. Bütün oyunları qələbə ilə başa vurmaq istəyirik”.