Azərbaycan Basketbol Liqasının VII turunda "Sərhədçi" İdman Mərkəzində keçirilmiş "Ordu" (Bakı) – "Şəki" oyunundan (74:80) sonra hər iki komandanın baş məşqçisi fikirlərini bildirib.

Prosport.Az həmin fikirləri təqdim edir:

Bedri Meriç ("Şəki"): "Ordu" ilə ilk matçdakı çatışmazlıqlarımız üzərində yaxşı hazırlaşmışdıq. Həmin vaxt yaxşı müdafiə oluna bilməmiş, nəticədə 20 xal fərqlə uduzmuşduq. Bu gün isə xüsusən müdafiəyə çox diqqət ayırdıq və uğurlu olduq. Komandanın kapitanı Aleks Koldvell bizim üçün çox vacib oyunçudur. Hakimlər tərəfindən onun oyundan çıxarılması bir az haqsızlıq idi. Ancaq açığı, bu məqam bizə motivasiya verdi. Bundan sonra komanda daha əzmkar oynadı, əlindən gələni artıqlaması ilə etdi. Bizim ehtiyatdakı bütün oyunçularımızın hazır olması lazımdır. Ehtiyat heyət şansımız çox yüksək deyil. Ona görə də ehtiyacımız olacağı halda, bir gün başqa oyunçumuz ulduza çevrilə bilər. Bu gün də Pol Dibal 18 xal toplayıb MVP oldu və buna görə çox şadam".

Alberto Blanko ("Ordu”): “İlk növbədə rəqibi qələbə münasibətilə təbrik edirəm. Onlar buna layiq idi. Bilirəm ki, liqada rəqibləri qələbəyə görə təbrik edən yeganə məşqçiyəm. Ancaq mənə belə öyrədiblər. Rəqibin oyunçu və məşqçilərinə həmişə hörmət etmək lazımdır. 2-cisi, öz oyunçularımı da təbrik edirəm. Bir sıra problemlərə baxmayaraq, bu gün hətta hesabda 10 xal fərqlə geridə olmağımıza baxmayaraq, komanda əzmkarcısına mübarizə apardı. Oyunun taleyi elə bir məqamda həll olundu ki, biz hesabdakı xal fərqini artıra bilmədik. “Şəki” isə fiziki cəhətdən bizdən üstün idi və bu amil oyunun taleyini həll etdi”.