Gələn il avqustun 7-17-də Çinin Çendu şəhərində keçiriləcək Ümumdünya Oyunlarının Təşkilat Komitəsi Azərbaycan karateçisi İrina Zaretskayanın iştirakını təsdiqləyib.

Prosport.Az xəbər verir ki, qurumun saytında artıq müxtəlif idman növləri üzrə vəsiqə qazanan idmançıların siyahısı dərc olunub.

Azərbaycan millisinin karateçisinin də adı bura daxil edilib. Ümumdünya Oyunları üçün ilk vəsiqələr karateçilərə ötən il Budapeştdə keçirilmiş dünya çempionatındakı nəticələrə görə verilib. Zaretskaya (68 kq) orada ardıcıl 3-cü dəfə çempion titulunu qazanıb. Onun finaldakı rəqibi Elena Kuiriçi (İsveçrə) və dünya çempionatının bürünc mükafatçısı Seyko Zefaniya (İndoneziya) da Çenduda çıxış edəcək.

Qeyd edək ki, Azərbaycan Ümumdünya Oyunlarında gimnastikanın 3 növündə – tamblinq (Mixail Malkin), akrobatika (Ağasif Rəhimov – Raziyə Seyidli qarışıq cütlüyü, Murad Rəfiyev – Daniel Abbasov kişi dueti, həmçinin Riad Səfərov, Rəsul Seyidli, Abdulla Əl-Meşaihi və Seymur Cəfərovdan ibarət kişi qrupu) və aerobikada (Vladimir Dolmatov – Mədinə Mustafayeva qarışıq cütü) də təmsil olunacaq.