"Bu gün rahat qələbə qazandıq. Çünki matçın əvvəlindən sonunadək hesabda geriyə düşmədik. Oyunun tempini və idarəetməsini tamamilə əlimizdə saxladıq. Rəqibimizin sərgilədiyi oyuna da zaman-zaman uyğunlaşmağa çalışdıq".

Prosport.Az xəbər verir ki, bu sözləri "Naxçıvan"ın baş məşqçisi Murat Dikmen Azərbaycan Basketbol Liqasının VII turunda NTD-yə 95:77 hesabı ilə qalib gəldikləri oyundan sonra klubun mətbuat xidmətinə açıqlamasında deyib.

Türkiyəli mütəxəssis qələbəni belə şərh edib: "Bu gün sadəcə şəxsi bacarıqların ortaya çıxdığı bir matç izlədik. Bu anda da bizim oyunçularımızın daha təcrübəli olmağı əsas rol oynadı. Xüsusilə də Cordon Perkins və Cörmeyn Marrounun performansını qeyd edərdim. Onların şəxsi bacarıqlarından daha çox istifadə etdik. Ancaq ümumilikdə mən ortaya qoyulan oyundan məmnun deyiləm. Həm hücum, həm də müdafiədə göstərilən oyundan zövq almadım. Qələbə qazandığımız üçün xoşbəxtəm, ancaq oyunmuzdan yox. Komandamı təbrik edirəm. Artıq 6-cı qalibiyyətimizi qazandıq. Ümid edirəm, eyni şəkildə davam edərik".