Azərbaycan Basketbol Liqasının VI turunda "Şəki" səfərdə “Quba”nı 90:68 hesabı ilə məğlub edib.

Prosport.Az xəbər verir ki, matçdan sonra hər iki komandanın baş məşqçisi oyunla bağlı fikirlərini açıqlayıb.

Bedri Meriç ("Şəki"nin baş məşqçisi): "Əvvəla, Qubada belə gözəl atmosfer yaratdığına görə həm nazirliyə, həm də federasiyaya təşəkkürümü bildirirəm. Dolu tribuna önündə oynadıq. Bəlkə də tribunanın dolu olması bizə motivasiya verdi. Çünki oyunçularımız daha istəkli oynadı. Biz öncə müdafiə olunmağa çalışırıq. Düzgün müdafiə olunduğun zaman, hücumların da alınır. Oyunçularıma qələbədəki rollarına görə təşəkkür edirəm. Matçda böyük fərq olmazdı. Ancaq "Quba"nın rotasiya imkanının olmaması, ehtiyat qüvvəsinin yoxluğu nəticəsində oyunçuları yoruldu və biz də bundan yaxşı yararlanıb, 22 xal fərqlə qalib gəldik"

Şəhriyar Əsgərov ("Quba"nın baş məşqçisi): "Bu oyuna yaxşı hazırlaşmışdıq. İstəyirdik ki, evdə qalib gələk. Təəssüf ki, alınmadı. "Şəki"yə bir oyunçunun komandası demək olar. Çünki rəqibin bir oyunçusu 42 xal atdı, hardan atdı, o da düşdü. Bizim oyunçularda bir az yorğunluq oldu. Ehtiyat skamyanın zəifliyi də öz sözünü dedi. "Şəki" isə istədiyi kimi dəyişikliklər edirdi. Bizim üçün çox ağır məğlubiyyət oldu. Növbəti oyunlara daha yaxşı hazırlaşmaq lazımdır. "Şəki" heç nədə bizdən üstün deyildi. Sadəcə, dediyim kimi, Aleks Koldvellin atdığı nə var idisə, səbətə düşdü. Vəssalam. O da bizim komandanın bütün səylərini sıfıra endirdi. Sözsüz ki, bizim oyunçuların da oyunlarında çatışmazlıqlar çoxdur. Təbii ki, hər şeyin daha yaxşı olmasına çalışacağıq. Hazırlıqlarımıza davam edəcəyik. Ümid edirəm ki, növbəti turlarda daha yaxşı olacağıq".