Azərbaycan Basketbol Liqasının V turunda "Şəki" "Lənkəran"ı 89:64 hesabı ilə məğlub edib.

Prosport.Az xəbər verir ki, B qrupunda baş tutan matçdan sonra V turun qarşılaşmalarına və müntəzəm çempionatda I dövrəyə yekun vurulub.

Bununla da "Şəki" xalını 8-ə yüksəldib. Komanda B qrupunun lideri "Gəncə"dən 1 xal geridədir. Matçdan sonra komandaların baş məşqçiləri fikirlərini bildirib:

Bedri Meriç ("Şəki"): "Biz bu qələbəni zədələnən və mövsümü erkən başa vuran kapitanımız Kris Bartona həsr edirik. O, ötən tur "Gəncə" ilə matçda zədələndi və təəssüf ki, aramızdan ayrıldı. Onun yoxluğunda "Lənkəran"la matçda problemlə üzləşəcəyimizi gözləyirdim. Ancaq oyunçularım bu gün möhtəşəm çıxış etdi. Xüsusən, müdafiədə yaxşı oynadıq. Yaxşı müdafiə olunub, fərqi artırdıq".

Georgi Kondruseviç ("Lənkəran"): "Şəki"ni təbrik edirəm. Onlar bu gün daha çox komanda oyunu oynadı. Ümid edirəm ki, növbəti tura qədər oyunumuzu dəyişdirmək üçün kifayət qədər gücümüz, vaxtımız və anlayışımız olacaq. Düşünürəm ki, ilk dövrənin nəticələrinə görə həm yaxşı, həm də pis oyunlar keçirdik. Hazırda bizdə olanla kifayətlənirik... Komandamızda kadr problemləri yaranandan sonra oyun keyfiyyətimiz xeyli düşdü. Bu, xüsusən son 2 matçda hiss olunur. Biz çox vaxt fərdi hərəkətlərə yönəlirik və basketbolun komanda ilə oynanan bir idman növü olduğunu unuduruq. Əgər bunu anlamasaq, hər bir rəqibə qarşı oyunlarda problemlərimiz olacaq".

Qeyd edək ki, turun əvvəlki 5 matçında "Quba" "Ordu"ya (101:75), "Sərhədçi" NTD-yə (84:79), "Abşeron" "Neftçi"yə (72:56), "Sabah" "Naxçıvan"a (75:74), "Sumqayıt" isə "Gəncə"yə (85:79) qalib gəlib.