"Komandamı qələbə münasibətilə təbrik edirəm. Bunu çoxdan gözləyirdik".

Prosport.Az xəbər verir ki, bunu "Sumqayıt" basketbol klubunun baş məşqçisi Aleksandr Mixaylov bildirib.

Rusiyalı məşqçi "Gəncə" üzərində qazanılan qələbə barədə açıqlama verib: "Hələ tam olaraq komplektləşməmişik. Komandada müəyyən çatışmazlıqlar var. Rəqib 15 xal fərqlə öndə olsa da, uşaqlar əsl xarakter nümayiş etdirdi. Oyunçularımı mümkün qədər sakitləşdirib matça köklədim. Rəqibi yaxşı incələmişdik. Bundan əvvəlki matçlarda 3-cü periodlarda problem yaşayırdıq, bu dəfə isə müqavimət göstərə bildik. İdeal oynamasaq da, səliqəli çıxış etdik. Uşaqlar tapşırıqlarımı yerinə yetirdi. Azarkeşlərimizə də ayrıca təşəkkür düşür. Hələ oyun başlamamışdan bizə əməlli-başlı dəstək verdilər. Onlar bizi irəliyə səslədi. İnanın ki, bu oyunçuların meydanda gördüyü iş qədər vacib idi".